الصرف الصحي
سؤال للشركة القابضة لمياه الشرب والصرف الصحي، ممكن اعرف إيه العلاقة بين المياه والصرف الصحي غير إننا بنشربهم هما الاثنين؟
*******
أضرار البانجو
نصحية لكل الشباب الضرّيبة، بلاش بانجو لانه طلع بيؤدي لكسر الجمجمة وكسر الاسنان وعظام الفك.. مش كدة وبس، ده كمان بيخليك سوابق وعليك أحكام وهربان من الجيش
*******
هنكتشف قريب
طبعا هنكتشف قريب إن ضحية التعذيب الجديد فى المنصورة اصيب بالكسور والنزيف والكدمات بعد ما جاتله اسفسكيا الخنق لانه كان سارق التوك توك ولما شاف المخبرين بلع التوك توك
*******
مسئول أحول
إسرائيل موّتت واحد مصري، وفي نفس اليوم طلع باشا مسئول في الخارجية يحذر حماس من استفزاز مصر, أدعوك لتكشف على نظرك لتستفيد من العلاج على نفقة الدولة
*******
قرار الرئيس
قرار الرئيس بتعيين 44 عضو بمجلس الشورى!.. امال بتقولوا فيه بطالة ليه بس ماهو فيه تعيين اهو؟
*******
جمعية الرفق بالانسان
الدول المتقدمة تمنع قتل الكلاب رميا بالرصاص "رفقا بالحيوان".. اما في مصر فنواب الحزب الوطني يطالبون بضرب المتظاهريين بالرصاص.. يبدو أننا نحتاج في بلدنا لتكوين: جمعية الرفق بالانسان
*******
السلام
هى مصر لمّا وقعت اتفاقية السلام مع اسرائيل.. كان الاتفاق إن السلام يكون من طرف واحد بس؟
*******
مين دول؟
النواب اللي طالبوا باطلاق النار على المتظاهرين، زيهم زي نواب القروض ونواب المخدرات ونواب التأشيرات ونواب السيديهات ونواب الاستيلاء على أراضي الدولة ونواب الدم الفاسد ونواب القمار ونواب الفتنة الطائفية ونواب العلاج على نفقة الدولة.. كلهم نواب وطنيين ديمقراطيين
*******
الحديد والنار
يقال إن النائب نشأت القصاص طالب بضرب المتظاهرين بالنار حتى تكتمل منظومة الحزب: الحديد والنار
*******
المواطن المصري
المواطن المصري اصبح مسحولا في لبنان، مضروبا في السودان، مطرودا من الكويت، مجلودا في السعودية، مكروها في الجزائر.. مطحونا في بلده
*******
قتيل مصري
قتيل مصري في لبنان واخر في نيجيريا وثالث في اليونان..المفروض اخواننا المصريين في قارتي امريكا واستراليا "يتداروا" شوية اليومين دول
*******
مياه النيل
دول حوض النيل وقعت اتفاقية من غير مصر والسودان، واثيوبيا بتقول مصر مش هاتقدر تمنعنا من بناء سدود على النيل.. مبروك علينا طابور المية المعدنية يا رجالة
*******
مرسيدس
سؤال واللي يجاوبه ياخد 75 قرش.. ليه الحكومة بتاعتنا بتطلب من شركة مرسيدس اسم المسئول المرتشي، مع ان وزارة العدل الامريكية قالت ان هي اللي عندها اسم المسئول ده؟
*******
كهربني شكراً
بعد تعميم نظام كروت شحن الكهرباء المدفوعة مقدما.. ياترى الحكومة عاملة حسابها لو رصيدنا خلص.. نقدر نبعتلها رسالة: كهربني شكراً
*******
الاعتصام
المعتصمون امام مجلس الشعب قرروا الاعتصام بالملابس الداخلية.. أخيراً نجحت الحكومة انها تتطلّع الناس من هدومها
بقلم الكاتب :عمرو رفعت
ليست هناك تعليقات:
إرسال تعليق